■黃徙
思慕，是一種溫度
無蓋燒ê度數
拄好番仔火點著蠟條
蠟條光，炤會出
目屎滴咧滴咧
一點一點遠
誠好算
若是蠟條雙頭燒
足緊！珠淚隨焦去
眼前攏暗去
無法度摸著思慕
只好割心腸
一條一條無偌長
雙跤拔直直ê體溫
愈來愈無度數
數念，是一種距離
親像雷公爍爁
看著影偌久？才聽著聲
這段時間乘以光速
就是距離
誠好算ê數念，你會嫌
光速傷慢爾爾
若是無啥當聽
表示伊離你足遠
抑是伊咧叫你，傷細聲
抑是伊攏叫你囡仔時ê名
無就是你袂記得細漢ê聲音
尤其是歹天，常在雷公爍爁
伊共你抱咧攬咧，惜命命
數念賰一點仔驚惶
無距離ê聲和影
心悶，親像茶咧滾
超過90度就開始噴煙
袂輸起飛ê白頭鬃
起落崎ê山崁，一片挐氅氅
等滾水沖落茶米，茶葉慢慢坦開
腦海中一頁一頁ê記持才掀開
回憶才開喙
叫人心悶
按呢
心悶比數念較燒
數念比思慕較熟
思慕歹按算
上長，到天邊ê田園
上遠，到海墘
日落ê厝邊
阮佇黃昏算閣算
偌久？閣天光
記持叫開門
老ê！來耍