詩‧攝影／葉莎
再過看幾下仔
還盡細个綠，會舖一張藍色个水床
在詐睡个深處
慢慢仔生出青綠色?琉璃瓦
紅色个屋簷，大廈還有高樓
逐扇窗門戴一个愛春天个人
逐隻春天守等一坵田
還盡細个綠
順等闊野野个藍天排列仔
歡喜个心像葉仔
一皮打開來
再過打開一皮
再過看幾下仔
還盡細个綠，揇等滿哪都係福壽螺个童年
日頭燒暖燒暖仔來孵化
像刺婆、草莓粒恁樣黏等?卵矻
變做一種見綠就食?侵入
還盡細个綠
釋放大大个善良
捐出心、肝、肺摎春風
甚至昨暗晡个月光
逐擺寬容，多一分耗損
逐分耗損，全部係對現實个退讓
還盡細个綠
耕種人看顧等，春雨乜痛惜
佢揇等摸摸挲挲个時間
一路寬容，一路抵抗
夢想變做還較大个綠色
註：本詩為客語海陸腔。