■黃徙
人生茶一杯，路寒袖送予伊蔡秀英
逐家來啉
逐家坐落來！予人生
走傱ê雙跤歇睏
予跤印停落來佮跤底相認
予焦躁和喙脣相唚
予茶水佮知音相印
予咱這世人
清心一下，來！啉一杯
燒冷攏相伨
蔡秀英，伊青春
做過女工，毋知影雙手按怎紡
雙跤按怎𨂾
閣較重嘛是搬枋模夯鐵板
閣較深只是和海底相唚
落水，平平沈全無重頭輕
做過檳榔西施賣過涼水
毋知影少年時有偌媠
一照鏡，抹胭脂
家己嘛袂認得
伊長期佇飯店廚房煮食
生活無嫌熱
干焦血汗一逝一逝
淋佇塗跤不如沃落紙
伊開始跟老師學寫詩唱歌
無想著嚨喉喝喝ê，人會變快活
土牛畫畫ê，會和詩人仝括
這陣，蔡秀英欲開店
伊半世人ê眠夢鋪佇店面
歡迎光臨！來啉