■游鍫良
暗夜的火金蛄 位樹林懸懸低低的烏頭鬃飛去 親像一條引路的金粉 自由飛過咱的夢 共天星月娘仝款 愈暗愈光 四界攏真精彩
閃光的雲天 毋知是毋是猶會當輾落啥物 佇透早進前送來甘露 草埔頂梳頭鬃 變成囡仔歌 蝴蝶點醒青翠 共咱的忝頭攏綴時間消失
聽講看著是一種幸福 幸福的記持有一種寄託 聽講看著會予人清醒 清醒的大腦就有清芳的營養 啉著大自然甘露佮空氣
昨暝的火金蛄 不三時佇大腦起飛 天星享受自由 甘露佮空氣接受著世界 分享 快樂
欶著人生 啉著紅塵 咱攏是天星的護持 聽講佮記持攬著火金姑 多謝有這份因緣
