詩‧攝影/柯柏榮
(01)海吞日
日頭覕佇雲後壁
光懶屍懶屍
雲綿綿纏纏
我覕佇鏡頭的後壁
等待跛跤的潟湖
殕黃的色水
喙開一縫，吞落
上尾這口氣
(02)掠雲
搣一把雲
刻人生
刻愛
扳開指頭仔
流落一片
虛無
(03)〈燈下思〉
一節光，一節
暗。共無常，拍散
共茫茫渺渺浞作一丸
吞落、發酵、激出
一步想、一步嘆
行向性命的盡磅
(04) 孤葉
黃去的標本
懶懶虛虛
向望青翠染色
幔一軀重出塗的詩
(05) 石縫葉
生菇的焦葉
石頭疊的厝間
我上四配的肥底
(06)落葉
秋猶閣咧發酵
馬西馬西的跤印
顛甲滿四界
(07) 壁藤
纏根、纏梗、纏葉
功夫盡展、撇步盡出
拚勢仝行仝命
(08) 乞食
崁一領透中晝的日頭
予跤頭趺結趼若石
予汗水結冰若心
人生的財庫
貯滿虛空
(09) 收工
忝忝無元氣的光線
䖙佇厝瓦頂
看一隻一隻狗蟻
趖轉去睏日子
(10)桐花毯
驚垃圾是我的本性
請莫用文明
𧿬踏我的清白