■黃徙
林中信，畫兩個荷蘭人
徛佇鹿耳門鎮門宮做門神
門神褪赤跤
踏佇塗沙
海湧來回吞食
沙埔留下一逝一逝
過去ê跤跡，親像蛇
干焦吐喙舌唌人欲相唚
有情無情
歹確認
天氣足熱，燒風透袂煞
門神規身軀足刺疫
若是褪腹裼嘛較快活
至少有人來拜，有通食
徛蹛遮嘛講才袂厭
若無，江山只是一張紙
紙面無人來行踏
做神仙嘛是無較縒
干焦歷史罰徛
歹生活
1661，4月24海湧出世
4月26湧仔開目，4月30鄭荷相觸！
彼時，鹿耳門港
塗沙，比鐵板較
交橫閂門鎖台江
鹿耳連帆，一片江水起嬈
鹿耳春潮，潮音起痟
哭枵！這號海象
這號府城天險
荷蘭人啊料想袂到
竟然擋袂牢
鄭成功彼號跤數
料想袂到改變台灣歷史ê火炮
竟然發生佇in兜
林中信in兜徛佇戰火洗過
鹿耳門港南岸ê北汕尾島
世世代代討海
四百年後人才知
遮是台灣ê肚臍
台灣ê名字、人才、氣概
攏出世佇遮，號做台江內海
台灣國土上蓋西
日頭上慢落海
天蓋上濟色彩
漁船仔上暗轉來厝內
大細漢攏咧等待ê所在
人從(tsng)台灣ê生腸出世
就守(tsi)佇肚臍空
鹿耳門守(si))風候潮
潮水若是流到門口
海湧仔有時浮有時沉
等待好運不如落海走翸
1624，荷蘭人入台江彼時陣
鄭成功才出世佇日本
1661，荷蘭戰敗轉去
隔一年鄭王伊嘛死
歷史親像一齣戲
在人喙舌而已
風ê喙舌搧酒悾，花ê喙舌吸鮮血
雪ê喙舌舐千里，月ê喙舌ê江水。
林中信ê喙舌是畫筆
毋是講話抑寫字
伊將荷蘭王揆一畫做酒神
將紅毛女畫做花神
將鄭王ê第一勇將
陳澤畫做戰神
酒神畫甲斯文斯文
淋寡酒落，變面愛相ê
花神攏是人ê菜
沙埔有人挽菜無人栽
戰神，死著所在
寺廟才服侍
彼一日，台江內海一片紅記記
無人會記得
到底是佗一爿？血染台窩灣才紅
等待天色一下暗
浮上江面ê，閣會喝救人
一聲一聲，攏聽無
攏無熟似ê叫聲
干焦平埔族ê形影
佇江邊海墘咧追鹿仔囝
驚惶～驚惶，海面照鏡
浮出台灣ê名，可惜
無人惜命命
郡王牽著媽祖ê手上岸
林中信ê手牽歷史，畫人畫出神。
莊柏林ê台語詩上傳神
是予媽祖ê喙舌家己講話
管待伊華語台語抑是平埔族語
「他每日為我祈禱
為我燒香
是我每日最後的影子」
「郡王跪倒在地
以最誠懇的雙手
牽我踏進
這個永遠的土地」
是感情咧傳神，毋是文字抑言語
林中信ê油畫上傳神
是予人，愛恨情仇ê眠夢
猶未天光就現身佇門窗
是予神ê向望
無落壇嘛隨時顯靈
予鄭成功變做騎海翁ê人
予海翁泅入老台江
揣著改變台灣歷史這一縫
管待in咧變啥魍
按呢，林中信咧畫人
常在家己畫甲出神
神才活靈靈
親像思念ê人
一直來託夢