■黃徙
2020總統就職和國慶
送予外國元首貴賓ê伴手禮
台灣藍鵲茶、石虎米
這陣起大賣，因為有故事
有故事，投入ê心血就開花
較舊ê田庄
猶未眠夢就天光
一天光，人客隨圍來
買茶食飯
這號茶予人啉落，芳氣起飛
喉韻一回閣一回
予人佮意一杯紲一杯
親像天燈一直飛過
長尾山娘仔、石虎轉來做伙
翡翠水庫ê面
攏浮出一幅一幅畫
倒吊佇雲尾
印印佇水下，懸懸低低
暝時ê天頂點燈火
日時ê田園點點點茶花
坪林變畫冊
農民，一頁一頁掀過
遊客，規本睏過
上可取ê是「八百金」社會企業
智邦科技濟濟公司用心血
讀過寫過，予坪林12个流域
恢復一片大自然ê教材
予咱小學生會曉講祖先ê過去
會曉講1萬5千年前冰河時期
石虎，跙冰若跙流籠
對台灣海峽滑一下
坪林隨到地
予好奇ê觀光客，來遮
啉著茶水會歡喜
食著石虎米煮ê飯
呵咾甲會觸舌
數百年來賣糊藥走江湖
到這馬，無疑悟
坪林啉茶食飯
竟然變驕傲
【註】
1／跙流籠(tshū-liû-lông)：溜滑梯。
2／無疑悟(bô-gî-ngūo)
：料想不到。